广州人食嘅煲仔饭无关“仔”

唐龙

最近睇到一个微信笑话，大意系话，有一位外国朋友嚟广州旅游，问导游：听说广州人连孩子也敢吃，因为你们吃煲仔饭。

  呵呵呵！煲仔饭点会系“吃孩子”呢，真搞笑。呢个笑话之可以编成笑话，主要同“煲仔饭”中嘅“仔”字喺粤语中可一字多义嘅特点有关。

  粤语中嘅“仔”正写本应系“崽”，“仔”系同音字。“仔”字最初嘅意思指年龄小嘅人或动物，比如男仔、女仔、细路仔、鸡仔、狗仔等，但后嚟就“升级”用埋喺年龄大一啲嘅男性身上，比如后生仔、保安仔等。再后嚟，“仔”字就引伸到唔分男女，唔分事或物，只要相对系“小”嘅，都可以套上呢个“仔”，比如姨仔、讲古仔、衫仔、碟仔、屋仔、树仔等。可以睇出，“仔”字喺粤语中用得好广，但同时又可以有多种解释同理解。

  “煲仔饭”笑话就系“外国朋友”理解有误，佢将“仔”错理解成系细路仔，而前面又系个有烹煮意思嘅“煲”字，所以就变成“烹煮孩子”，最后就有咗“吃孩子”嘅笑话。

  但事实上，广州人食嘅煲仔饭，“煲仔”只系一个餐具名，其中“仔”系指餐具型号“小”嘅意思，“煲仔”就系细型号嘅瓦煲。其实，类似用“仔”做名嘅粤菜仲有好多，比如碗仔翅、艇仔粥、钵仔糕等，佢哋冚棒冷都同细路仔无关。

分析家

广东话有意思,

芈睿宸

我也来看看了解。